Повик за учество во креативен предизвик : Eurofusion, гастрономско патување I Краен рок : 30.10.2026

Aко сте дел (наставник/ученик) од средно стручно училиште со образовна програма од областа на угостителството и сакате да учествувате во проект кој ги поврзува кулинарството, јазиците и културната размена, Францускиот институт во Скопје ве поканува да се вклучите во проектот „Eurofusion – гастрономско патување“, чија цел е да обедини средни стручни училишта од повеќе земји во регионот околу единствен креативен предизвик:

создавање рецепт што спојува француски кулинарски специјалитет со традиционален специјалитет од локалната кујна.

🌍 Регионален проект што ги поврзува културите

Во проектот ќе учествуваат ученици од Албанија, Босна и Херцеговина, Хрватска, Грција, Северна Македонија и Србија, кои ќе имаат можност да ја изразат својата креативност и кулинарски вештини.

Целта е секое училиште заедно со своите ученици да создаде оригинален рецепт, инспириран од француската и од локалната гастрономска традиција.

Преку проектот, учениците ќе запознаат различни кулинарски традиции, ќе соработуваат и ќе го користат францускиот јазик во конкретен, креативен и практичен контекст.

Со менторство од наставниците по угостителство и француски јазик, учениците ќе треба да создадат:

🍽️ Оригинален рецепт, (благ или солен), кој вклучува елементи од француски специјалитет и специјалитети од локалната кујна;

✨ Име на кулинарското оригинално дело ;

✍️ Краток текст од најмногу 250 збора кој ќе ја раскаже приказната за рецептот, инспирацијата и начинот на кој е настанат;

📖 Поимник со кулинарски термини или специфични културни поими, доколку е потребно.

Сите материјали треба да бидат подготвени на два јазика: француски и на локалниот/мајчин јазик.

Учениците имаат целосна слобода во осмислувањето на своите креации. Можат да спојат два традиционални рецепта или пак, во еден рецепт да комбинираат состојки, техники на подготовка, форми и визуелни елементи карактеристични за двете култури.

👩‍🏫 Соработка помеѓу наставниците

Проектот поттикнува соработка меѓу стручната настава и наставата по странски јазик.

На часовите по готвење, учениците ќе го осмислуваат и ќе го подготвуваат рецептот под менторство од наставникот.

На часовите по француски јазик, ќе работат на пишувањето на рецептот, придружниот текст и поимникот.

На овој начин, учениците ќе имаат можност да го применат францускиот јазик во вистински професионален контекст, низ практична активност.

📖 Книга со рецепти од целиот регион

Рецептите создадени во шесте земји учеснички ќе бидат дел од илустрирана, повеќејазична книга со рецепти, која ќе биде објавена во дигитална и печатена верзија.

На овој начин, креативните дела на учениците ќе бидат претставени заедно со рецептите на нивните врсници од целиот регион.

Во рамките на Месецот на Франкофонијата, во март 2027 година, предвидена е и изложба посветена на проектот.

Дел од креациите ќе бидат претставени и преку видео-содржини на социјалните мрежи на проектот.

🎯 Зошто да учествувате ?

Преку овој проект, учениците ќе имаат можност да

– ја развиваат својата креативност и кулинарски вештини;

– ги истражуваат и промовираат француската и локалната гастрономска традиција;

-го користат францускиот јазик во автентични ситуации;

-ги унапредуваат вештините за усно и писмено изразување;

-работат тимски на конкретен и креативен проект;

-запознаваат други култури;

-промоција на ученичките творби;